वेळेत आरोग्य सेवा मिळाल्याने प्रसूत माता व बाळ सुखरूप!
एटापल्ली;(गडचिरोली)
तालुक्यातील लांजी गावाच्या शेजारील नाल्यावर पुलाचे बांधकाम झालेले नसल्यामुळे, रहदारीसाठी नागरिकांना नेहमीच त्रास सहन करावा लागतो. अशातच (ता.१० सप्टेंबर) मंगळवारी बबिता किशोर मट्टामी (वय १६) या अल्पवयीन गरोदर मातेला प्रसूतीसाठी रुगणालायत दाखल करतांना नाल्याच्या पुरातून जीवघेणा प्रवास करावा लागला आहे. मात्र प्राथमिक आरोग्य केंद्र तोडसाच्या वैद्यकीय पथकाने वेळेत व तत्परतेने उपचार केल्याने मातेची सामान्य प्रसूती होऊन माता व बाळ सुखरूप आहेत.
दीड महिन्यांपूर्वी १८ जुलैला भामरागड तालुक्यातील कुडकेली येथील गरोदर मातेला नाल्याच्या पुरामुळे जेसीबीच्या बकेटमधून जीवघेणा प्रवास करावा लागला होता, ही घटना ताजीच असतांना. लांजी येथील गरोदर माता बबिता मट्टामी ही घरी असतांना तिला (ता.१० सप्टेंबर) मंगळवारी सकाळी दहा वाजताच्या सुमारास अचानक प्रसूतीच्या कळा येण्यास सुरूवात झाली. ही माहिती येथील आशा वर्कर वनिता पुंगाटी यांना समाजल्यावरून त्यांनी प्राथमिक आरोग्य केंद्राचे वैद्यकीय अधिकारी डॉ राकेश नागोसे यांना भ्रमणध्वनीवरून कडविली. माहितीवरून त्यांनी तात्काळ तोडसा प्राथमिक आरोग्य केंद्राची रुग्णवाहिका मागवून लांजी गावाकडे बबिता मट्टामी या गरोदर मातेला उपचारार्थ घेऊन येण्यास निघाले.
मागील दोन दिवसांपासून परतीच्या मुसळधार पावसाने धुमाकूळ घातला असून नदी व नाले दुथळी भरून वाहत आहेत. लांजी गावाशेजारी नाल्यावर पुल नसल्यामुळे पुराच्या पाण्यातून रुग्णवाहिका गावापर्यंत पोहचू शकली नाही. त्यामुळे डॉ राकेश नागोसे, सामुदायिक आरोग्य अधिकारी सलोनी डांगे, आरोग्य सेविका बुधाबाई लेकामी, आरोग्य सेवक दत्तु मडावी, आरोग्य सेविका वैशाली वेलादी, आशा वर्कर वनिता पुंगाटी यांनी गावकऱ्यांच्या मदतीने कसेबसे त्या गरोदर मातेला घेऊन पुराच्या पाण्यातून पायी चालत दुसऱ्या तीरावरील रुग्णवाहिके पर्यंत पोहचविण्यात आले. यावेळी नाल्याच्या पलीकडे रुग्णवाहिका असल्याने आणि नाला पुराच्या पाण्याने भरून वाहत असल्यामुळे त्या गरोदर मातेला नाला ओलांडतांना जीवघेणा प्रवास करावा लागेल आहे.
एकीकडे प्रसुती कळा सुरू असल्याने असाह्य वेदना आणि दुसरीकडे जीवघेणा प्रवास अश्या परिस्थितीत कसेबसे आरोग्य पथक व नातेवाहिकांचा मदतीने त्या गरोदर मातेला नाला ओलांडून रुग्णवाहिकेत बसविण्यात आले. लांजी नाल्यावरून जवळपास पाच किलोमीटर अंतरावर तोडसा प्राथमिक आरोग्य केंद्रात तिला प्रसूतीसाठी दाखल करण्यात आले. सुदैवाने दुपारी तीन वाजता दरम्यान तिची प्रसूती सामान्यतः झाली असून तिने एका गोंडस मुलीला जन्म दिला आहे. प्रसूती नंतर माता व बाळ सुदृढ असून बबिता व नवजात मुलीची तपासणी करून उपचार केले जात असल्याचे तालुका आरोग्य अधिकारी डॉ सचिन कन्नाके यांनी “जनकत्व” न्युज नेटवर्कशी बोलतांना सांगितले आहे.
