आरोग्य सचिवांसह उच्चस्तरीय यंत्रणेकडून दोन दिवस निरीक्षण,
गडचिरोली;
जिल्ह्यातील आरोग्य सेवा अधिक सक्षम आणि प्रभावी करण्यासाठी लवकरच मंत्रालयात बैठक घेऊन आवश्यक उपाययोजना करण्याबाबत शासनस्तरावर मांडणी करण्यात येइल असे सार्वजनिक आरोग्य विभागाचे सचिवांनी (दि.१४) शुक्रवारी गडचिरोली येथे स्पष्ट केले आहे.
राज्य आरोग्य विभागाचे सचिव निपुण विनायक आणि सचिव वीरेंद्र सिंग यांच्या उच्चस्तरीय समितीने गडचिरोली जिल्ह्याच्या आरोग्य यंत्रणेचा दोन दिवसांचा सखोल आढावा घेवून निरीक्षण केले आहे. सदरच्या समितीने (दि. १३) गुरुवारी सायंकाळी सात वाजता दरम्यान गडचिरोली येथे आरोग्य यंत्रणेची बैठक घेतली. तसेच (दि. १४) शुक्रवारी सकाळी अकरा वाजता पासून जिल्हा सामान्य रुग्णालय, जिल्हा महिला रुग्णालय व वैद्यकीय महाविद्यालय येथे भेट देऊन आरोग्य सुविधांची पाहणी केली तसेच त्यांनी आरोग्य क्षेत्रात कार्यरत सामाजिक संस्था ‘सर्च’ येथे भेट देऊन संवाद साधला आहे.
या दौऱ्यादरम्यान गडचिरोली जिल्ह्यातील आरोग्य सेवा सुधारण्यासाठी तयार करण्यात आलेले प्रस्ताव १५ दिवसांच्या वर प्रलंबित राहिल्यास तातडीने पाठपुरावा करण्याची सूचना सचिवांनी संबंधित अधिकाऱ्यांना दिल्या. पंधराव्या वित्त आयोगाच्या निधीअंतर्गत मंजूर प्रकल्प वेगाने पूर्ण करण्यासाठी आणि निधीअभावी प्रलंबित राहिलेल्या योजनांसाठी त्वरित निधी मागणी करण्याची आवश्यकता असल्याचे सचिवांनी स्पष्ट केले. कारण या निधीचा उपयोग करण्यासाठी आता केवळ एक वर्ष शिल्लक राहिल्याने ही कामे प्राधान्याने पूर्ण करण्याचे निर्देश त्यांनी दिले आहे.
प्रधानमंत्री जन आरोग्य योजनेंतर्गत अधिकाधिक आयुष्मान कार्ड तयार करण्यास प्राधान्य देण्याची सूचना करून, कोणत्याही रुग्णावर केवळ आयुष्मान कार्ड प्रलंबित असण्याचे कारणास्तव उपचार थांबवू नये, याची पूर्ण दक्षता घेण्याचे आदेश सचिवांनी दिले आहेत. कोणत्याही परिस्थितीत कोणताही रुग्ण उपचारांपासून वंचित राहता कामा नये, असे त्यांनी स्पष्ट केले आहे.
आरोग्य सेवा सुधारण्यासाठी आवश्यक बाबींचे दस्तऐवजीकरण करून, जिल्हाधिकारी आणि मुख्य कार्यकारी अधिकारी यांच्यामार्फत शासनाला त्वरित प्रस्ताव सादर करण्याचे त्यांनी सांगितले आहे.
या बैठकीस जिल्हाधिकारी अविश्यांत पंडा, जिल्हा परिषदेचे मुख्य कार्यकारी अधिकारी सुहास गाडे आणि आरोग्य विभागाचे सर्व वरिष्ठ अधिकारी उपस्थित होते. सचिव द्वयांसोबत सह सचिव अशोक आत्राम, सीईओ (SHAS) आण्णासाहेब चव्हाण, आरोग्य सेवा संचालक डॉ नितिन अंबाडेकर, पुणे येथील सह संचालक डॉ कमलापुरकर आणि डॉ सरिता हजारे, ब्लड बँकेचे डॉ महेंद्र केंद्रे, एनयूएचएमच्या उपसंचालक डॉ दिप्ती पाटील आणि डॉ विनोद पहाळे, कुष्ठरोग सह संचालक डॉ संदीप सांगळे, हॉस्पिटल आणि प्रोक्योरमेंटच्या सह संचालक डॉ सुनिता गोल्हाईत तसेच सोनल गावंडे, डॉ कैलास बाविस्कर आणि कक्ष अधिकारी नारायण डोळस ही उच्चस्तरीय अधिकाऱ्यांची समिती दोन दिवसीय दौऱ्यात सहभागी होती.
दौऱ्यात गडचिरोली जिल्ह्यातील नव्याने सुरू झालेल्या वैद्यकीय महाविद्यालयाची पाहणी करण्यात आली. प्रस्तावित इमारत बांधकाम, आवश्यक साधनसामग्री, तसेच प्राध्यापक आणि तांत्रिक मनुष्यबळ यावर सखोल चर्चा करण्यात आली.
जिल्हाधिकारी श्री पंडा व मुख्य कार्यकारी अधिकारी श्री गाडे यांनी जिल्ह्यात चार नवीन आरोग्य केंद्र मंजूरीसाठी शासनस्तरावर प्रलंबित असल्याचे सांगितले. तसेच नवीन आरोग्य उपकेंद्रांची निर्मिती करतांना गडचिरोली जिल्ह्याच्या बाबतीत लोकसंख्यानिहाय विचार न करता, आदिवासी दुर्गम व विस्तिर्ण क्षेत्राचा विचार करून विशेष उपकेंद्रांची निर्मिती व्हावी असेही सांगितले.
जिल्हा आरोग्य अधिकारी डॉ प्रताप शिंदे आणि जिल्हा शल्यचिकित्सक डॉ माधुरी किलनाके यांनी जिल्ह्यातील आरोग्य व्यवस्थेची माहिती सादर केली.
