शासनाचे दोघींवरही प्रत्येकी आठ, आठ लाख रुपयांचे बक्षीस,
गडचिरोली;
जिल्हा पोलिसांनी नक्षल चळवळीला आणखी एक जबर हादरा दिला असून सुमारे सोळा लाख रुपयांचे बक्षीस असलेल्या प्रमिला सुखराम बोगा उर्फ मंजुबाई (वय ३६) आणि अखिला संकेर पुडो उर्फ रत्नमाला उर्फ आरती (वय ३४) दोन जहाल महिला नक्षलींनी आज पोलिसांपुढे आत्मसमर्पण केले आहे.
प्रमिला सुखराम बोगा उर्फ मंजुबाई ही धानोरा तालुक्यातील बोगाटोला येथील रहिवासी असून सन २००५ मध्ये ती टिपागड नक्षल दलम मध्ये सामील झाली होती. २०११ पर्यंत ती तेथे कार्यरत होती. पुढे २०१४ पर्यंत वैरागड दलम आणि त्यानंतर केकेडी दलममध्ये तिने हिंसक कारवायांचे काम केले आहे. २०१५ मध्ये कंपनी क्रमांक चार मध्ये तिची बदली झाली होती. यानंतर २०१८ मध्ये प्लाटून पार्टी कमिटी सदस्य म्हणून बढती होऊन ती २०२१ पर्यंत तेथे कार्यरत होती. २०२२ मध्ये दंडकारण्य सप्लाय टीममध्ये बदली होऊन आजपर्यंत ती प्लाटून पार्टी कमिटी सदस्य म्हणून कार्यरत होती. तिच्यावर चकमकीचे २०, जाळपोळीचे २ आणि अन्य १८ असे एकूण ४० गुन्हे दाखल आहेत. शासनाने तिच्यावर आठ लाख रुपयांचे बक्षीस जाहीर केले होते.
अखिला पुडो ही धानोरा तालुक्यातील मरकेगाव येथील रहिवासी आहे. २०१० मध्ये ती टिपागड दलममध्ये सामील झाली होती. २०१४ मध्ये ती प्लाटून क्रमांक १५ आणि त्यानंतर कंपनी क्रमांक चार मध्ये सदस्य झाली. २०१५ मध्ये ती दंडकारण्य सप्लाय टीमची सदस्य होती, २०१८ पासून ती प्लाटून पार्टी कमिटी सदस्य आणि आजपर्यंत कार्यरत होती. तिच्यावर चकमकीचे २, खुनाचे ४ आणि अन्य १ असे एकूण ७ गुन्हे दाखल असून, राज्य शासनाने आठ लाख रुपयांचे बक्षीस जाहीर केले होते.
२०२२ पासून आतापर्यंत २१ नक्षल्यांनी आत्मसमर्पण केल्याची माहिती पोलिसांनी दिली. दरम्यान, नक्षल्यांनी हिंसेचा मार्ग सोडून आत्मसमर्पण करून स्वाभिमानाचे जीवन जगण्याचे आवाहन जिल्हा पोलिस अधीक्षक नीलोत्पल यांनी केले आहे.
