फेरफार नोंद घेण्यासाठी घेतली सहा हजार रुपयांची लाच,
अहेरी;(गडचिरोली)
तालुक्यातील महागाव सांजाचा व्यंकटेश सांबय्या जल्लेवार (४० वर्ष) व खमनचरु महसुली मंडल अधिकारी भूषण रामभाऊ जवंजाळकर (३८ वर्ष) हे तीन हिस्सेदारांच्या नावाने जमिनीचा फेरफार करुन त्यांची नावे सातबारावर नोंद करण्यासाठी संबंधित इसमाकडून सहा हजार रुपयांची लाच स्वीकारताना लाचलुचपत प्रतिबंधक विभागाच्या अधिकाऱ्यांनी दोघांनाही रंगेहात पकडून अटक केली आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार तीन व्यक्तींच्या नावाने असलेल्या जमिनीचा फेरफार करुन त्यांची नावे सातबारावर नोंद करावयाची होती. त्यासाठी तलाठी व्यंकटेश जल्लेवार याने स्वतःसाठी आणि मंडळ अधिकारी भूषण जवंजाळकर याच्यासाठी प्रत्येकी ४ हजार ५०० रुपये याप्रमाणे एकूण ९ हजार रुपयांची लाच मागितली. तडजोडीअंती ते दोघांसाठी प्रत्येकी ३ हजार याप्रमाणे एकूण ६ हजार रुपये स्वीकारण्यास तयार झाले. परंतु लाच देण्याची मुळीच इच्छा नसल्याने तक्रारदाराने लाचलुचपत प्रतिबंधक विभागाकडे तक्रार केली होती. त्यावरून या विभागाचे पोलिस उपअधीक्षक चंद्रशेखर ढोले यांच्या नेतृत्वात कर्मचाऱ्यांनी पडताळणी करुन सापळा रचला असता (ता. ०२ ऑगस्ट) शुक्रवारी दोघांनाही ६ हजार रुपयांची लाच स्वीकारताना पंचांसमक्ष रंगेहाथ पकडण्यात आले आहे. जल्लेवार व जवंजाळकर यांच्यावर अहेरी पोलिस ठाण्यात गुन्हा दाखल करण्यात आला असून त्यांच्या निवासस्थानाचीही झडती घेण्यात आली आहे. दोन दिवसांपूर्वीच धानोरा पंचायत समितीतील जिल्हापरिषद बांधकाम विभागाचा कनिष्ठ अभियंता अक्षय अगळे याला कंत्राटदारांकडून एक लाख सत्तर हजार रुपयांची लाच घेतांना एसीबीने रंगेहात पकडले होते, त्यामुळे गडचिरोली जिल्हा भ्रष्टाचाराने किती पोखरलेला आहे, हे दिसून येत आहे.
सदरची कारवाही लाचलुचपत प्रतिबंधक विभागाचे पोलिस अधीक्षक राहुल माकणीकर, अपर पोलिस अधीक्षक सचिन कदम, संजय पुरंदरे यांच्या मार्गदर्शनाखाली पोलिस उपअधीक्षक चंद्रशेखर ढोले, पोलिस निरीक्षक शिवाजी राठोड, सहायक फौजदार सुनील पेद्दीवार, हवालदार शंकर डांगे, हवालदार किशोर जौंजारकर, प्रवीण जुमनाके यांनी केली आहे.
